അനിൽ പെണ്ണുക്കര -

ഫോമയുടെ സാഹിത്യ സാംസ്കാരിക പ്രസിദ്ധീകരണമായ അക്ഷര കേരളം ത്രൈമാസിക ജലവിഭവകുപ്പ് മന്ത്രി റോഷി അഗസ്റ്റിൻ അക്ഷര കേരളം മാനേജിംഗ് എഡിറ്റർ സൈജൻ കണിയോടിക്കലിന് നൽകി നിർവ്വഹിച്ചു. ഫോമാ കേരളാ കൺവൻഷനോടനുബന്ധിച്ച് തിരുവനന്തപുരം മസ്ക്കറ്റ് ഹോട്ടലിൽ നടന്ന ചടങ്ങിലാണ് പ്രകാശന കർമ്മം നടന്നത്.ഫോമാ കൺവൻഷൻ ചെയർമാൻ ഡോ. ജേക്കബ് തോമസ് ,ഫോമ നാഷണൽ കൺവൻഷൻ ചെയർമാൻ പോൾ ജോൺ, അക്ഷര കേരളം മാനേജിംഗ് എഡിറ്റർ സൈജൻ കണിയോടിക്കൽ , ജാസ്മിൻ പരോൾ, രാജു ഏബ്രഹാം, ട്രഷറർ തോമസ് ടി. ഉമ്മൻ, വിൻസന്റ് ബോസ് , പോൾ പറമ്പി തുടങ്ങിയവർ ചടങ്ങിൽ സംബന്ധിച്ചു ഫോമ കേരളാ കൺവൻഷന്റെ പശ്ചാത്തലത്തിൽ അക്ഷരകേരളം ത്രൈമാസികയുടെ ആദ്യത്തെ അച്ചടിച്ച പതിപ്പു കൂടിയാണ് പ്രകാശനം ചെയ്തത്. സാമൂഹ്യ സാംസ്കാരിക, സാഹിത്യ മേഖലകളിൽ ഫോമയുടെ ഇടപെടലുകൾ വ്യാപിപ്പിക്കുകയും അമേരിക്കൻ മലയാളികളിലെ സർഗ്ഗാത്മകതയെ പ്രോത്സാഹിപ്പിക്കുന്നതിന് വേണ്ടിയാണ് അക്ഷര കേരളം ത്രൈമാസിക തുടങ്ങിയതെന്ന് മാനേജിംഗ് എഡിറ്റർ സൈജൻ കണിയോടിക്കൽ പറഞ്ഞു.അമേരിക്കയിലെയും കേരളത്തിലേയും എഴുത്തുകാരുടെ രചനകളും, സമകാലിക രാഷ്ട്രീയ സാമൂഹ്യ സാംസ്കാരിക സാഹചര്യങ്ങൾ ചർച്ച ചെയ്യുന്ന ലേഖനങ്ങളും ഉൾപ്പെടുത്തിയാണ് അക്ഷര കേരളം രൂപകൽപ്പന ചെയ്തിരിക്കുന്നത്.

കഥാകൃത്തും നടനുമായ തമ്പി ആന്റണി ചീഫ് എഡിറ്ററായ അക്ഷര കേരളത്തിന്റെ ലിറ്റററി എഡിറ്റർമാരായി എഴുത്തുകാരായ പ്രിയ ഉണ്ണികൃഷ്ണൻ , സോയ നായർ, ഡോ. സുകുമാർ കാനഡ, ന്യൂസ് എഡിറ്റർമാരായി റോയി മുളകുന്നം, സൈമൺ വളാച്ചേരിൽ , കണ്ടന്റ് എഡിറ്റർമാരായി സണ്ണി കല്ലൂപ്പാറ, ബൈജു പകലോമറ്റം, ബാബു ദേവസ്വ, അഡ്വൈസറി ബോർഡ് മെമ്പർമാരായി അനിയൻ ജോർജ്, ടി. ഉണ്ണികൃഷ്ണൻ, തോമസ്.ടി. ഉമ്മൻ, പ്രദീപ് നായർ, ജോസ് മണക്കാട്ട്, ബിജു തോണിക്കടവിൽ എന്നിവർ പിന്നിൽ നിന്ന് പ്രവർത്തിക്കുന്ന അക്ഷര കേരളം ഫോമയുടെ മുഖ മാസിക കൂടിയാണ്.

വെല്ലുവിളികൾക്കിടയിലും സാധ്യമായ എല്ലാ മാർഗങ്ങളും ഉപയോഗിച്ച് കേരളം നേരിട്ട പ്രതിസന്ധി ഘട്ടത്തിൽ നാടിന് തുണയായി നിൽക്കാൻ ഫോമയ്ക്ക് കഴിഞ്ഞുവെന്നതിൽ സന്തോഷമുണ്ടെന്ന് സ്വാഗത പ്രസംഗത്തിൽ ഫോമ കേരള കൺവൻഷൻ ചെയർമാൻ ഡോ.ജേക്കബ് തോമസ് പറഞ്ഞു. കേരള കൺവൻഷൻ വൈസ് ചെയർമാൻ ബെഞ്ചമിൻ ജോർജ്ജ്, ഫോമ കൺവെൻഷൻ വൈസ് ചെയർമാൻമാരായ ബിനൂബ് ശ്രീധർ, ജോർജ്ജുകുട്ടി, കേരള കൺവൻഷൻ കോ-ഓർഡിനേറ്റര് ലാലു ജോസഫ്, ഫോമ വിമൻസ് ഫോറം ട്രഷറർ ജാസ്മിൻ പാരോൾ എന്നിവർ പരിപാടിക്ക് നേതൃത്വം നൽകി.

അർഹരായ വിദ്യാർത്ഥികൾക്ക് നഴ്സിങ്ങ് പഠനസഹായത്തിന് 'സഞ്ചയിനി' സ്കോളർഷിപ് നൽകുമെന്ന് ഫോമ വിമൻസ് ഫോറം ട്രഷറർ ജാസ്മിൻ പാരോൾ പറഞ്ഞു. ഈ വർഷം 100 കുട്ടികൾക്ക് സ്കോളർഷിപ് നൽകാനാണ് ലക്ഷ്യമിടുന്നത്. അതിന്റെ ആദ്യഘട്ടമായാണ് ഇപ്പോൾ അർഹരായ 40 വിദ്യാർത്ഥികളെ കണ്ടെത്തി സ്കോളർഷിപ് നൽകുന്നത്.

കുട്ടികളുടെ പഠനമികവും കുടുംബത്തിന്റെ വരുമാനവും പരിശോധിച്ചാണ് അർരായവരെ കണ്ടെത്തുന്നത്. അടുത്തഘട്ടമായി മറ്റു പ്രഫഷണൽ കോഴ്സുകളിൽ പഠിക്കുന്ന കുട്ടികൾക്കും സ്കോളർഷിപ് നൽകും. ഇങ്ങനെ തിരഞ്ഞെടുക്കുന്ന കുട്ടികളുടെ ഫീസ് മാത്രമല്ല, അവരുടെ കുടുംബത്തിന് ആവശ്യമായി വരുന്ന മറ്റ് സഹായങ്ങളും ലഭ്യമാക്കുമെന്ന് ജാസ്മിൻ പാരോൾ പറഞ്ഞു.

'സഞ്ചയിനി' സ്കോളർഷിപ് പദ്ധതിയുടെ ഭാഗമായി ഇന്ന് 40 കുട്ടികൾക്കായി 20 ലക്ഷം രൂപയാണ് വിതരണം ചെയ്തത്. വിമൻസ് ഫോറത്തിന് നാല് നാഷണൽ കമ്മിറ്റി മെമ്പർമാരും 12 റീജയണൽ മെമ്പർമാരും ഉൾപ്പെടുന്നതാണ് വിമൻസ് ഫോറം.